Palu Palu Rebano Ubi

Asal mari pucung dari hujung sano
Nun sapa hujung sano pulok aroh tuju kito
Ado hok belari, berjale, mengakok, mngesok,
Tok sikik hok menukat dagu tok tahu nok gi mano
Ghama hok duk die tutup mato, gerun takut kuong goba ado belako
Ado hok jadi isem tok kaba.. berat weh berat.. berat ujie Tuhe wi

Hok mok ayoh bekal bukenyo ime
mugo ime ni buke bendo buleh 'turun
hok mok ayoh bekalnyo didike
didike hok ambo 'buleh 'jadi ore hari ni

tapi dugae ni buke cale-cale
20 tahun lebih doh ambo duk lawe
20 tahun lebih doh ambo duk tepuh
Jatuh puluh-puluh kali xdey nok kiro
luko, keno bue, keno sepak, keno benci ado blako
ore kato, ore ngupak, ore ngaying tu puah cemuh doh
bia gi ore nok kato gapo, Tuhe tu buke 2 buke 3

Acu mu palu bano ubi tu ko aku
bia getar jatung aku ni
bia aku raso nele dale perut ni
bia terbakar daroh kelate aku ni
aku nok tepuh lagi hidup ni esok

Acu mu palu lagi bano ubi tu derah lagi
aku nok wak bekal sapa luso
Kalu buleh panggil pokya tiup suna
panggil pulok mat de, ketuk gende
Kito wak naik semangat kito
Kito panah balik daroh jadi kelate kito ni

Kito anok anok tok dekar,
Daroh dekar, keturune ulamok,
aloh hari ni, esok gi lawe smula
reboh hari ni, kare bangun smula.
Bia kito degil kerah peda
hadap blako dugae Tuhe bui ni
dengan usoho, ime dan doa anok beranok kito

Acu mu palu lagi bano ubi tu
Ambo ore jati anok kelate.
Ambo hormat ore tuo
Ambo jadi coto ko ore mudo
Ambo taat patuh ko mok ayoh
Ambo pege pado alim ulamok
Rajo ambo, ambo taat setio sapa bilo-bilo

Acu mu palu lagi bano ubi tu
Bia air mato aku tubek
bia dado aku getar kuat lagi
bia aku raso nok hungga
bia aku raso nok menepik
bia aku raso kuak
esok aku nok hadap
hidup aku sekali lagi


- lubis anok kelate